Өлкетану әдебиеттері бөлімінде журналист, ҚР еңбек сіңірген мәдениет қызметкері, жазушы, профессор Әбілфайыз Ыдырысұлы Ыдырысовтың 90 жылдығына арналған «Терең ойлы тегеурінді талант» кітап көрмесі ұйымдастырылды.

Оқырмандар назарына автордың қазақ халқының даңқты ұлдары М. Әуезовтың, С. Мұқановтың, Ғ. Мүсіреповтың көрнекті бейнелерін жасаған «Біртуарлар болмысы» эсселер жинағы мен адамға тән сезімдердің тазалығы мен биіктігі және алғашқы махаббаттың пайда болуы жайындағы көпшілікке белгілі «Таншолпан или история любви» романы ұсынылған. Бұлардан басқа көрмеден автордың «Сыр мен шындық», «Бағдарымыз – өркениет өрісі», «Газетті безендіру сыры» секілді жұмыстарымен таныса аласыздар. Ғажайып адам, дарынды жазушы, жарқын және өзіндік қолтаңбасы бар журналистің өмірлік және шығармашылық жолы мерзімді басылым бетінен көрініс тауып отырды.