2013 жылдың 1 наурызында мемлекет басшысы Н.Назарбаев Қазақстан Республикасындағы кәсіби және басқа да мерекелер тізіміне өзгерістер мен толықтырулар енгізу туралы жарлыққа қол қойды. Осы жарлықпен елімізде жаңа мереке – Отбасы күні бекітілді және оны қыркүйектің әрбір екінші жексенбісінде атап өту туралы шешім қабылданды.

Мерекені бекіту мен жыл сайын атап өтудің негізгі мақсаты мәдени құндылықтарды, дәстүрді, руханилықты сақтау, өскелең ұрпақты тәрбиелеу бойынша мемлекеттің ұлттық міндеттерін жүзеге асыру, отбасы институты арқылы демографиялық мәселелерді, сондай-ақ әлеуметтік сипаттағы мәселелерді шешу болды.

Біздің қоғамдағы отбасы қаншама заманнан бері түрлі ұрпақ өкілдерін байланыстырушы, рухани және мәдени дәстүрлерді сақтаушы болып келеді және солай болып қала бермек.

Отбасы күнін мерекелеу адамгершілікті, руханилықты нығайтуға, жұбайлар жауапкершілігінің қоғам үшін маңыздылығын талассыз мойындауға көмектеседі.

Отанды сүю отбасын сүюден басталады. Туған шаңырақ астында тәрбие алу – бұл барша халқымыздың болашағының саулығы мен жетістігінің кепілі болып табылады.