Белгілі ғалым, академик Уахит Хамзаұлы Шәлекеновтің ғылыми еңбектерінің төртінші томына Қазақстан археологиясы мен этнологиясына қатысты ұзақ  жылдық зерттеу еңбектері енді. Жинақ екі кітаптан тұрады. «Ежелден түріктер отырықшы» деп аталатын бірінші кітапта ғалым түрік халықтарына танылған еуроцентристік «көшпенділер» концепциясын нақты дәлелдермен теріске шығарып, жаңа ғылыми тұжырым ұсынады. Ал осы идеяның жалғасы іспетті «Қазақ өркениеті» атты екінші кітабында түрік жұртының көнеден келе жатқан бір бұтағы болып табылатын қазақ елі өркениетінің қалыптасу тарихы мен кезеңдеріне кеңінен талдау жасайды.

Қазақ археология ғылымының іргетасын қаласып, шаңырағын көтеріскен аға ғалымның бұл зерттеу еңбектері дәйекті дәлелдерге сүйенген тың тұжырымдарымен құнды, әрі рухани жаңғыру үстіндегі еліміздің бүгінгі және келешек ұрпақтарын ұлтжандылық пен отаншылдық рухта тәрбиелеуде танымдық, тағылымдық маңызы зор.

Жинақ жас ғалымдарға, студенттер мен жоғары сынып оқушыларына, жалпы оқырман қауымға арналған.